إللي إتعلمناه وعرفناه إن من البديهي لأي شخص يطلب الديمقراطية والمساواه إحترام الرأي الأخر وتقبله , ولكن اللي حصل من يوم 9 أبريل أو نقول من بداية الثورة ماشيين علي مبدأ إنت معانا ولا مع الناس التانيين ؟!!
وإللي حصل يوم 9 مارس ليا عليه أكتر من رأي وتعقيب وطبعاً أنا متوقع شتيمة قد كده قبل ما أقول حاجة وهي دي قمة الديمقراطية اللي بنحلم بيها ....!!!!
أولاً : هو إحنا ليه معندناش أي إستعداد إننا نحترم القانون وده شيء للحق من زمان من قبل الثورة يعني كنا نلاقي لوحة مكتوب عليها ممنوع التدخين وواحد قاعد تحتها مولع سيجارة ... عادي جداً .!!!
نيجي بقي للمهم والموضوع من أوله قولنا إن الجيش أخد شرعيته من الشعب وميدان التحرير وقدم كتير للثورة وده شيء محدش يقدر ينكره , ونفس الجيش ده بذات نفسيته هو إللي عمل قانون حظر التجول وفي الفترة الأخيرة خفضه ل 3 ساعات بس , ولما نجحت الثورة قولنا هنبدأ عهد جديد بمعني أن أول تغيير لازم نعمله إننا نحترم القانون شوية يعني في حظر يبقي حظر وقريت كومنت علي تويتر لواحد بيقول إنه في وقت الحظر رجع من التجمع لمدينة نصر وملقاش ولا عسكري جيش ويتسائل هو تنفيذ قانون الحظر علي اللي في التحرير بس ؟
وأنا أحب أرد عليه وأقوله لا بس المفروض إنت إللي بتحدد لنفسك وإحترام القانون نابع من جواك مش من عسكري واقف ...!!!
ثانياً : ليه مش سايبين فرصة للقضاء يشوف شغله هتردوا وتقولوا لا ده في تباطؤ .. والله إللي أنا شايفه إن مفيش تباطؤ في قضايا كتير فبتاخد وقت وده رأيي وكل واحد بيشوفها من وجهة نظره وموضوع إننا نسيب القضاء يشتغل ده بيرجعنا للنقطة الأولي وهي إحترام القانون .
ثالثاً : ضباط الجيش إللي كانوا في ميدان التحرير معتصمين ومتظاهرين مش هتكلم في موضوع هل هم ضباط فعلاً أم لا ولكن لو إفترضنا إنهم ضباط مش لازم يحترم القانون العسكري والمؤسسة إللي تابع ليها ويقدروا كمان المرحلة اللي بنمر بيها مينفعش دلوقتي يكون فيه إنقسام بين شعب وجيش ؟
والمفروض إن ضباط الجيش ملهمش أي ممارسة لأي عمل سياسي ....
في الحقيقة ده رأيي واللي شفته من الأحداث ممكن أكون صح وممكن أكون لا وكلامي ده بيدل علي وجهة نظري فقط ورسالتي الأخيرة ياريت نحترم أراء بعض ومش نخون بعض وإللي مش معايا يبقي ضدي لأننا لازم نقبل بكل الأراء ....... أكيد لينا كلام تاني
دمتم سالمين ...,
ليست هناك تعليقات:
إرسال تعليق